काठमाडौं – फिल्म ‘नाइँ नभन्नु ल ६’बाट ठूलो पर्दामा डेब्यू गरेका नायक आर्शिवाद क्षेत्रीले नयाँ फिल्म साइन गरेका छन् । उनी मंगलबार फिल्म ‘माया प्रीति’मा अनुबन्धीत भएको फिल्मको निर्माण पक्षले जानकारी दिएको हो।

यस फिल्मका निर्देशक अभि श्रेष्ठका अनुसार आर्शिवाद यस फिल्मको शीर्ष मध्येको एक कलाकारका लागि अनुबन्ध भएका हुन् । यस फिल्मको नायिकामा दिव्या रायमाझी यसअघि नै फाइनल भइसकेकी छन् । उनी गत माघमा नै यस फिल्ममा अनुबन्ध भएको जानकारी दिइएको थियो ।

यो लभस्टोरी फिल्ममा नायिका दिव्या र आर्शिवाद जोडीको भूमिकामा रहने बुझिएको छ ।यस फिल्मको अहिले वर्कसप अन्तिम चरणमा पुगेको छ । अबको केही दिनमै छायाङ्कन सुरु हुने निर्माण पक्षले बताएको छ ।

यसअघि निर्माण पक्षले बताएअनुसार यो फिल्म नयाँ पुस्ताको प्रेम कथामा आधारित छ । फिल्मको कार्यकारी निर्माता नायिका निशा अधिकारी हुन् । यसले पनि ‘माया प्रीति’ चर्चामा छ ।

वन टु थ्री स्टुडियोज प्रा.लि.को ब्यानरमा बन्ने यस फिल्मको अन्य जानकारी भने गोप्य राखिएको छ ।

आर्शिवादको यो तेस्रो फिल्म हो । ‘नाइँ नभन्नु ल ६’बाट डेब्यू गरेका उनले ‘श्री बुकुरो’ फिल्ममा अभिनय गरिसकेका छन् । यस फिल्मको छायाङ्कन पूरा भए पनि प्रदर्शन मिति तोकिएको छैन ।

नायक दिलीप रायमाझीकी छोरीसमेत रहेकी दिव्याले फिल्म ‘एक्टर : टेक वान’बाट गत वर्ष ठूलो पर्दामा डेब्यू गरेकी हुन् । गत वर्ष उनको अर्को फिल्म ‘पिताम्बर’ पनि प्रदर्शनमा आएको थियो ।

‘माया प्रीति’ दिव्या छायाङ्कनमा सहभागी हुने तेस्रो फिल्म बन्ने भएको छ ।