काठमाडौं– नेपाली राष्ट्रिय टोलीकी पूर्वस्ट्राइकर अनु लामाले घरेलु फुटबलबाट पनि सन्यास लिएकी छन् ।

विभागीय टोली एपीएफबाट खेल्दै आएकी अनुले बुधबार घरेलु फुटबलबाट पनि सन्यास लिएको घोषणा गरेकी हुन् ।

बुधबार त्रिपुरेश्वरस्थित दशरथ रंगशालामा सम्पन्न एन्फा महिला लिगको फाइनलमा एपीएफ नेपालले पुलिस क्लबलाई पराजित गरेको थियो ।

खेल सकिनेबित्तिकै अनुलाई एपीएफका खेलाडीले गार्ड अफ द अनरबाट सम्मान गर्दै बिदाइ गरे ।

अनुले अब घरेलु फुटबलको पनि यात्रा टुंगिएको बताइन् । उनले अब आफ्नो बाँकी जीवन फुटबल कोचका रुपमा बिताउने जानकारी दिइन् ।

करिब २१ वर्ष फुटबल खेलेको बताउँदै उनले अब नयाँ खेलाडीहरूका लागि ठाँउ छाडेको पनि उनले बताइन् ।

अनुले महिला फुटबलको थप विकास गर्न धेरैभन्दा धेरै घरेलु प्रतियोगिता चाहिएको पनि बताइन् । सन् २०१९ मा अनुले अन्तर्राष्ट्रिय खेल जीवनबाट सन्न्यास लिएकी थिइन् ।