काठमाडौं – गत जनवरी २० मा डोनाल्ड ट्रम्पले अमेरिकाको ४७ औँ राष्ट्रपतिको शपथ लिएसँगै गैरकानुनी रुपमा पुगेका आप्रवासीको भागभाग भइरहेको छ । राष्ट्रपति ट्रम्पले कम्तीमा पनि १४ लाख अवैध आप्रवासीलाई देशबाट निकाल्ने घोषणा गरिसकेका छन् ।

त्यही घोषणाअनुसार नेपाल, भारत र कोलम्बियासहितका देशका नागरिकहरूलाई धमाधम पक्राउ गर्न थालिएको छ । अवैध रुपमा कागजातबिना बसेकाहरूको दशा सुरु भइरहँदा यता अमेरिका नै पठाउने नाममा भइरहेको ठगी पनि उस्तै छ ।

वैदेशिक रोजगारीका लागि अमेरिका पठाइदिन्छु भन्दै एक करोड भन्दा बढी ठगी गरेको आरोपमा प्रहरीले एकजनालाई कञ्चनपुरबाट पक्राउ गरेको छ।

पक्राउ पर्नेमा कञ्चनपुरको शुक्लाफाँटा नगरपालिका वडा नम्बर १ निवासी २५ वर्षीय भुवन कार्की छन् । उनलाई काठमाडौं उपत्यका अपराध अनुसन्धान कार्यालयले सोमबार पक्राउ गरेर हिरासतमा लिएको हो ।

उनले बेरोजगार युवा-युवतीलाई आकर्षक तलबको प्रलोभनमा पारेर रकम ठगी गरेको कार्यालयका प्रवक्ता प्रहरी उपरीक्षक काजीकुमार आचार्यले बताए।

उनले अमेरिका पठाइदिने भन्दै अहिलेसम्म एक करोड रुपैयाँ संकलन गरेको आचार्यले बताएका छन्। आकर्षक तलब-सुविधाको लोभ देखाएर रकम संकलनपछि कार्की भागेका थिए ।

सम्पर्कविहीन भएपछि पीडितहरू प्रहरीमा उजुरी दिन पुगेका थिए। कार्कीलाई थप अनुसन्धान र कारबाहीको लागि जिल्ला प्रहरी परिसर भद्रकाली पठाइएको आचार्यले बताए ।