काठमाडौं- नेकपा एमालेले एघारौँ महाधिवेशनपछि नेताहरूको वरीयता करिब तय गरेको छ ।

यसअघिको पहिलो केन्द्रीय कमिटी बैठकबाटै एमालेले नेताहरूको वरीयता निश्चित गरेको थियो ।

तर आइतबार बसेको पहिलो सचिवालय बैठकमा अध्यक्ष ओलीले वरीयतालाई स्पष्ट पारेका छन् ।

उनले एघारौँ महाधिवेशनपछि उपाध्यक्षमा दोहोरिएका रामबहादुर थापा बादललाई आफूपछिको दोस्रो वरीयता दिने गरी आशन मिलाएका छन् ।

बादलपछि तेस्रो वरीयता उपाध्यक्ष विष्णुप्रसाद पौडेललाई मिलेको छ । त्यसपछि अर्का उपाध्यक्ष पृथ्वी सुब्बा गुरूङ, गोकर्ण विष्ट र रघुजी पन्तलाई छैटौँ वरीयता मिलेको छ ।

एमालेका त्यसपछि महासचिव शंकर पोखरेललाई वरीयता दिइएको छ । यद्यपि एमालेमा महासचिव पद अध्यक्षपछिको कार्यकारी हो ।

उता उपमहासचिवतर्फ पहिलो वरीयता लेखराज भट्टले पाएका छन् । उनी माओवादी पृष्ठभूमिका भए पनि यस पटक लोकप्रिय मत पाए ।

भट्टपछि उपमहासचिवमा रघुवीर महासेठ र योगेश भट्टराईलाई वरीयता निर्धारण गरिएको छ । सचिवतर्फ छविलाल विश्वकर्मा, पद्मा अर्याल, खगराज अधिकारीलाई पहिलो, दोस्रो र तेस्रो वरीयता दिइएको छ।

त्यसपछि अर्का सचिव भानुभक्त ढकाल, शेरधन राई, यामलाल कँडेल, डा. राजन भट्टराई, हिक्मत कार्की र अन्तिममा महेश बस्नेतको वरीयता तय गरिएको छ ।