काठमाडौं– नेपाल प्रिमियर लिग (एनपीएल)को टिम कर्णाली याक्सका कप्तान सोमपाल कामीले दोस्रो संस्करणमा शीर्ष चारमा स्थान बनाउने दाबी गरेका छन्। शुक्रबार कर्णालीले एनपीएलमा विराटनगर किंग्ससँग तीन विकेटको हार बेहोरेको थियो।

हारका बाबजुद सोमपालले बाँकी तीन खेलमा सकारात्मक नतिजा ल्याउने जनाउँदै प्रतियोगिताको शीर्ष चारमा स्थान बनाउने दाबी गरेका हुन्।

‘आज धेरै गल्ती गर्यौं। जसका कारण हामीले हार बेहोर्‍यौँ। यो खेलको एउटा अंश हो। अझै तीन खेल बाँकी छ। हामी शीर्ष चारमा जसरी पनि स्थान बनाउनेछौँ। यसको निम्ति हामी तयार छौँ,’ उनले भने, ‘आजको हारले निराश भइहाल्नुपर्ने अवस्था छैन। हामी बाँकी खेलमा जित हासिल गर्नेमा केन्द्रित छौँ । यी खेलमा उत्कृष्ट प्रदर्शन गरेर शीर्ष चारमा पुग्नुपर्छ।’

शुक्रबार कीर्तिपुरस्थित त्रिवि क्रिकेट रंगशालामा अन्तिम पाँच ओभरमा विराटनगरले ६९ रन बनाउँदै कर्णाली याक्सविरुद्ध तीन विकेटको रोमाञ्चक जित निकालेको थियो। हारसँगै तालिकाको पाँचौँ स्थानमा सीमित कर्णालीले सातमध्ये चार खेल खेल्दा एक जित र तीन हारसहित दुई अंक जोडेको छ।