गोरखा– उत्तरी गोरखाको मनास्लु क्षेत्रमा प्रमुख बाली करु भित्र्याउने सिजन सुरु भएको छ। हिमाली भेगमा केहीदिनदेखि करु काट्ने सिजन सुरु भएको चुमनुब्री गाउँपालिका वडा नं. २ ल्होका साङ्गेदोर्जे लामाले जानकारी दिए।

३१०० मिटर उचाइमा रहेको नुब्री उपत्यकामा अहिले किसानहरु धमाधम करु काट्न थालेका उनले बताए।

‘हाम्रो मुख्य बाली करु र आलु हो’ लामाले भन्नुभयो, ‘अहिले करु भित्र्याउने सिजन सुरु भएको छ। हामीलाई बिहानैदेखि करु काट्न भ्याइनभ्याइ छ। आलोपालो अर्मपर्म गरेर करु भित्र्याउने गर्छौँ।’

करु साउनमा र चैतमा रोप्ने गरिन्छ । ‘उच्च हिमाली हावापानीका कारण तीनहजार मिटरभन्दा माथि बर्षमा दुई पटकमात्र खेतीबाली लगाइन्छ’, लामाले भने, ‘चैतमा लगाएको करु असारमा काटिन्छ, फेरि साउनमा लगाएर कात्तिकमा काटिन्छ। सँधै उही बाली लगाइरहनु हुँदैन भनेर आलोपालो गरेर कहिले मकै कहिले आलु लगाउँछौँ।’

करु चम्पा(सातु), खोले र ढिडो बनाएर खानका लागि प्रयोग गर्ने गर्छन्। उच्च हिमाली भेगको करु स्वादिलो, पोषिलो हुनेहुँदा काठमाडौँ बस्नेहरुले पनि झिकाएर प्रयोग गर्ने गाउँलेहरुको भनाइ छ।