काठमाडौं- भारतीय प्रधानमन्त्री नरेन्द्र मोदीले दक्षिणपूर्वी एशियाली मुलुकहरुसँग समुद्री सम्बन्ध थप विस्तार गर्न इच्छुक रहेको जनाएका छन् । दक्षिणपूर्वी एशियाली मुलुकहरुको संगठन आशियान–भारत सम्मेलनमा प्रधानमन्त्री माोदीले समुद्री सम्बन्ध विस्तार गर्न इच्छुक रहेको जनाएका हुन् ।

प्रधानमन्त्री मोदीले सन् २०२६ लाई आशियान–भारत समुद्री साझेदारीको वर्षका रुपमा पनि घोषणा गरेका छन् । भारतीय समाचार संस्था ईएएनएसले जनाएअनुसार प्रधानमन्त्री मोदीले पछिल्लो समय भारत र दक्षिणपूर्वी एशियाली मुलुकहरुबीच मानवीय सहायता एवम् विपद् राहत (एचएडीआर) को क्षेत्रमा सहकार्य वृद्धि भइरहेको पनि उल्लेख गरेका छन् ।

सम्मेलनलाई भर्चुअल रुपमा सम्बोधन गर्दै प्रधानमन्त्री मोदीले शिक्षा, पर्यटन, विज्ञान तथा प्रविधि, स्वास्थ्य, हरित ऊर्जा र साइबर सुरक्षाजस्ता क्षेत्रमा पनि द्विपक्षीय साझेदारीलाई अभिवृद्धि गर्न तत्पर रहेको उल्लेख गरे ।

आशियानलाई भारतको ‘एक्ट इस्ट’ नीतिको महत्वपूर्ण स्तम्भका रुपमा व्याख्या गर्दै प्रधानमन्त्री मोदीले आशियानलाई सहयोग गर्न आफ्नो मुलुक सदैव तत्पर रहेको पनि जनाएका छन् ।