काठमाडौं- भारतको निजी क्षेत्रको व्यापारिक गतिविधि यस वर्षको अगस्ट महिनामा उल्लेख्य वृद्धि भएको पाइएको छ । सन् २०२५ को अगस्ट महिनामा भारतको उत्पादन तथा सेवा क्षेत्रको गतिविधि कीर्तिमानी स्तरमा वृद्धि भएको छ ।

एसएण्डपी ग्लोबलले सार्वजनिक गर्ने एचएसबीसी पर्चेजिङ म्यानेजर्स इन्डेक्स (पीएमआई) का अनुसार अगस्टमा भारतीय निजी क्षेत्रको गतिविधि ६५.२ को उच्च स्तरमा पुगेको छ । यो सन् २००५ यता सार्वजनिक हुँदै आएको सूचकमा सबैभन्दा उच्च हो ।

यसअघि जुलाई महिनामा यो सूचकांक ६१.१ रहेको थियो । यो सूचक ५० भन्दा माथि हुँदा व्यापारिक गतिविधिमा विस्तार भएको संकेत मिल्छ ।

प्रतिवेदनका अनुसार नयाँ अर्डरहरूमा तीव्र वृद्धि, निर्यातमा सुधार र रोजगारी सिर्जनाका कारण यस्तो वृद्धि भएको हो । भारतीय समाचार संस्था एएनआईका अनुसार सेवा क्षेत्रमा माग बढेको छ । त्यसैगरी, उत्पादन क्षेत्रमा कच्चा पदार्थको आपूर्ति सहज भएकोले भारतमा व्यापारिक आत्मविश्वास थप बलियो बन्न पुगेको छ ।

यद्यपि, लागत दबाब र मुद्रास्फीतिको जोखिम अझै कायम रहेको विश्लेषकहरूले बताएका छन् । यो वृद्धिले भारतको अर्थतन्त्रमा सकारात्मक संकेत देखाए पनि दीर्घकालीन स्थीरता लागि नीतिगत सुधार र लगानी वृद्धिमा जोड दिनुपर्ने विज्ञहरूको सुझाव छ।