काठमाडौं– नेपाल फाइनान्स लिमिटेडले हकप्रद शेयर बिक्री गर्दा नबिकेको शेयर लिलामी बिक्रीमा ल्याउने भएको छ । कम्पनीले ७ लाख ९४ हजार ९७१.१८७ कित्ता संस्थापक शेयर लिलाम बिक्रीमा ल्याएको हो ।

लिलामीमा बिक्रीमा राखिएको शेयरको मूल्य प्रतिकित्ता १०० रुपैयाँ तोकिएको छ । इच्छुक आवेदकले न्यूनतम प्रतिकित्ता १०० रुपैयाँ वा त्यो भन्दा बढी राखेर आवेदन दिनुपर्ने छ । उक्त शेयरमा जो कोहीले आवेदन दिन सक्ने छन् ।

आवेदन दिँदा कम्तिमा १ हजार कित्ता र बढीमा १० ले निःशेष भाग जाने अङ्कमा वा सम्पूर्ण कित्ताका लागि दिन सकिने छ ।

आवेदन बिहीबारदेखि भदौ २६ गतेभित्र दिनुपर्ने छ । आवेदन काठमाडौंको कमलादीस्थित प्रभु क्यापिटल लिमिटेड, नेपाल फाइनान्सको केन्द्रीय कार्यालयका साथै बनेपा, माछापुच्छ्रे, लगनखेल र तिलोत्तमा शाखा कार्यालय तथा प्रभु बैंकको विराटनगर, वीरगञ्ज, पोखरा, नेपालगञ्ज, सुर्खेत र धनगढी शाखा कार्यालयमा दिन सकिने छ ।