काठमाडौं – पछिल्लो समय टिकटकबाट चर्चामा आएकाहरु फिल्ममा प्रवेश गर्ने संख्या बढ्दो छ । यसको मुख्य उदाहरण नायिका गरिमा शर्मा, पारस बम ‘कुल ब्वाइ’, मिस पबीलगायत हुन् ।

फेरि अर्का टिकटकरले पनि फिल्ममा गर्ने भएका छन् । दुबईकी युवती एलिजे जमालीसँग प्रेम सम्बन्ध र विवाहका कारण चर्चामा आएका आयुष सिंह ठकुरीले फिल्ममा अभिनय गर्ने भएका हुन् ।

उनी माइकल चन्दको निर्देशनमा बन्न लागेको एक्सन जनाराको फिल्म ‘राम नाम सत्य’मा अनुबन्ध भएका हुन् । निर्माण पक्षले उनीसँग कागजी सम्झौता भएको सोमबार सार्वजनिक गरेको हो । आयुषको यो डेब्यू फिल्म बन्नेछ ।

थुप्रै फिल्मको प्रस्ताव आए पनि कथावस्तु मन परेकाले ‘राम नाम सत्य’बाट ठूलो पर्दामा डेब्यू गर्न लागेको आयुषले बताए । उनले थपे, ‘यो फिल्मको कथा र मेरो भूमिका शक्तिशाली छ ।’

फिल्मको लेखकसमेत रहेका निर्देशक चन्दका अनुसार आयुषले ‘राम नाम सत्य’ लागि महिना दिनअघि देखि एक्सनको अभ्यास गरिरहेका छन् । एक्सनको अभ्यास सकिएपछि उनलाएई अभिनय प्रशिक्षण गराउने चन्दले बताए ।

उनले भने, ‘आयुषले निकै मिहिनेत गरिरहनु भएको छ । यही फिल्ममा जोडिने पक्का भएपछि उहाँले एक्सन सिकिरहनु भएको छ । अब अभिनय पनि सिक्नुहुन्छ ।’

निर्देशक चन्दका अनुसार यस फिल्मको छायाङ्कन साउन २९ बाट सुरु हुनेछ । फिल्ममा नायकहरु विराज भट्ट, सुशील श्रेष्ठ, अर्पण थापा, नायिकाहरु सुपुष्पा भट्ट र दिव्या रायमाझी शीर्ष भूमिका रहने निर्माण पक्षले बताएको छ ।

अझै एक नायिका अनुबन्ध भएपछि कलाकारको लाइनअप पूरा हुने निर्देशक चन्दले बताए ।

माइकल इन्टरटेन्मेन्ट हाउसको ब्यानरमा निर्माण हुन लागेको यो फिल्ममा उपेन्द्र शाही र स्वेता विमली लगानी रहनेछ ।