सिन्धुली- सुनकोशी र रोशी खोलाको दोभानमा अवस्थित हिन्दूहरूको प्रसिद्ध धार्मिक क्षेत्र कुशेश्वर महादेव मन्दिर दर्शन गर्न यो वर्ष कठिनाइ भइरहेको छ।

गत वर्ष असोज १२ गते रोशी खोलामा आएको बाढीले ह्युमपाइप बगाएपछि दर्शनार्थीलाई मन्दिरसम्म जान कठिनाइ भएको हो।

हिमवत पुराणको नेपाल महात्म्यमा उल्लेख भएअनुसार यो क्षेत्रमा कौशिक ऋषीले तपस्या गरेका थिए।

कुशेश्वर मन्दिरकै पारीपट्टि सुनकोशीको किनारमा ऋषि विश्वामित्रले तपस्या गरेको स्थान समेत रहेको छ। यहीँबाट गायत्री मन्त्रको उत्पत्ति भएको शिव पुराणमा उल्लेख रहेको पाइन्छ।

पहिला रोशी खोलामा ह्युमपाइप राखेर गाडी लगायत पैदल यात्रीलाई मन्दिरसम्म जाने ब्यवस्था मिलाइएको थियो।

तर गत बर्षको बाढीले ह्युमपाइप बगाएपछि अहिले मन्दिर दर्शन गर्न रोशी तरेर जानुको विकल्प छैन। सानो पानी पर्दा पनि रोशीको बहाव बढ्ने हुँदा अहिले मन्दिरमा दर्शनार्थी घटेका छन् ।

गत वर्षको बाढीले सुनकोशी नदि माथी बनेको पक्की पुलसमेत बगाएपछि अहिले यहाँबाट मध्यपहाडी राजमार्ग हुँदै रामेछापको खाँडादेवी, दोरम्बा र शैलुङ्ग जाने सडक यातायात पनि बन्द छ।

पुल भत्काएसँगै अहिले यहाँका बासिन्दाहरूलाई रामेछाप जान करिब १५ किलोमिटर तल मूलकोट पुग्नुपर्ने बाध्यता छ।

तस्बिरहरू : नेपाल फोटो लाइब्रेरी