काठमाडौं – निर्देशक दीपेन्द्र के खनालले बायोपिक ‘क्याप्टेन साब’को छायाङ्कन सुरु गरेका छन् । उनले काभ्रेको बेथानचोकबाट शनिबारदेखि छायाङ्कन सुरु गरेका हुन् ।

निर्देशक खनालका अनुसार यो फिल्मको छायाङ्कन काभ्रे, काठमाडौं, चितवन र वीरगञ्जमा हुनेछ ।

यो क्याप्टेनसमेत रहेका व्यवासायी रामेश्वर थापाको बायोपिक हो । रामेश्वरको भूमिका नायक खगेन्द्र लामिछानेले निर्वाह गर्ने तय भएको छ । फिल्मको नायिका सुरक्षा पन्त हुन् ।

छायाङ्कनमा निस्किएका खनालले एक फरक खालको कथामा फिल्म बनाउन लागेको बताए । ‘क्याप्टेन साब’ रामेश्वरको संस्मरण कृति ‘इन्टो द फायर’मा आधारित रही उनका जीवनका उत्तारचढाव समावेश गरी फिल्म मनोरञ्जनपूर्ण बनाउने उनको दाबी छ ।

यस फिल्मको लेखक निर्देशक दीपेन्द्र आफैँ हुन् । पटकथा प्रडक्सन, यार्सा स्टुडियो र रिच इन्टरटेन्मेन्टको सहकार्यमा बन्ने यो फिल्मको निर्माताहरु खनालसहित करण श्रेष्ठ र श्रृष्टिमा खनाल छन् ।