काठमाडौं– राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानेन्द्र शाहीले भिजिट भिसा प्रकरणका दोषीहरूलाई सामाजिक बहिष्कार गर्न आग्रह गरेका छन् । 

राप्रपाले भिजिट भिसा प्रकरणका दोषीहरूलाई संसद्मा बहिष्कार गरिरहेको भन्दै उनले आमनागरिकलाई पनि दोषी र दोषीका समर्थकहरूलाई चिया पसलदेखि विवाह समारोहसम्म सामाजिक बहिष्कार गर्न आग्रह गरेका हुन् । 

प्रतिनिधिसभाको शनिबारको बैठकबाट बाहिरिने क्रममा संसद् परिसरमा पत्रकारहरूसँग कुरा गर्दै शाहीले भिजिट भिसा प्रकरणका दोषीहरूलाई सामाजिक रूपमा एक्ल्याउन सामाजिक बहिष्कार आवश्यक रहेकोमा जोड दिए ।

राप्रपाका प्रवक्तासमेत रहेका शाहीले भिजिट भिसा प्रकरणले देशको छविमा नकारात्मक असर पारेको भन्दै संलग्न व्यक्तिहरूलाई कुनै पनि हालतमा उन्मुक्ति दिन नहुने पनि बताए । 

‘हामीले संसद्भित्रबाट बहिष्कार गरिरहेका छौँ, अब तपाईंहरू आमजनताले चिया पसलदेखि विवाह समारोहसम्म उनीहरूलाई बहिष्कार गर्नुहोस्,’ शाहीले भने, ‘यसले गर्दा दोषीहरू र उनीहरूका समर्थकहरूलाई सामाजिक रूपमा एक्लो महसुस हुनेछ र यस्ता कार्यहरू भविष्यमा दोहोरिने छैनन् ।’

शाहीले भिजिट भिसाको दुरुपयोगले नेपाली युवा विदेशमा अलपत्र पर्ने र दुःख पाउने अवस्था आएको भन्दै यस विषयमा सरकार गम्भीर हुनुपर्ने बताए । उनले दोषीहरूलाई कारबाही नभएसम्म आफ्नो पार्टीले संसद् र सडक दुवैबाट आवाज उठाइरहने प्रतिवद्धता व्यक्त गरे ।

राप्रपा गत जेठ १३ गतेदेखि भिजिट भिसा प्रकरणमा मुछिएका गृहमन्त्री रमेश लेखकको राजीनामा माग्दै आएको छ । शनिबारको संसद् बैठकमा पनि राप्रपाका सांसद रोशन कार्कीले गृहमन्त्रीलाई नैतिकताका आधारमा राजीनामा दिन सुझाव दिएकी थिइन् । 

‘गृहमन्त्रीज्यू तपाईंसँग नैतिकता छ भने राजीनामा गर्नुस् । र, छानबिनलाई सघाउ पुर्‍याउनुस्,’ उनले भनिन् ।