काठमाडौं – काठमाडौंको तीनकुनेसहितका क्षेत्रमा लगाइएको कर्फ्यूको समय थप गरिएको छ ।

काठमाडौं जिल्ला प्रशासनले एक सूचना जारी गर्दै भोलि (शनिबार) बिहान ७ बजेसम्मलाई कर्फ्यू थप गरिएको जनाएको हो ।

काठमाडौंका प्रमुख जिल्ला अधिकारी ऋषिराम तिवारीले कर्फ्यू जारी गरिएको क्षेत्रमा भेला, जुलुस, प्रदर्शन, घेराउजस्ता गतिविधि गर्न निषेध गरिएको जानकारी दिए ।

यसअघि शुक्रबार अपराह्न ४ः२५ बजेदेखि राति १० बजेसम्मका लागि कर्फ्यू जारी गरिएको थियो ।

जिल्ला प्रशासन कार्यालयले तीनकुने, कोटेश्वर र सिनामंगल क्षेत्रमा कर्फ्यू जारी रहने जनाएको छ । कर्फ्यू लगाइएपछि नेपाली सेना बख्तरबन्द गाडीसहित तीनकुने क्षेत्रमा निस्किएको थियो ।

राजधानीका केही हिंसाग्रस्त क्षेत्रमा सेना परिचालनको आदेश भएसँगै प्रहरीलाई पनि आगजनी गर्नेमाथि गोली चलाउन सरकारले अनुमति दिएको छ।