काठमाडौं– प्रमुख सत्तारूढ नेपाली कांग्रेसले ताप्लेजुङको प्रसिद्ध धाम पाथीभरा मन्दिरसम्म जानका लागि निर्माणाधीन केबलकारबारे देखिएको विवाद वार्ताको माध्यमबाट समाधान गर्नुपर्ने निष्कर्ष निकालेको छ ।

शुक्रबार पार्टी सभापति शेरबहादुर देउवाको बूढानीलकण्ठस्थित निवासमा बसेको पदाधिकारीले बैठकले ‘नो केबलकार’ भन्ने कुरामा कांग्रेसको सैद्धान्तिक सहमति नरहेको निष्कर्ष निकालेको हो ।

तर अहिले देखिएको विवादलाई वार्ताका माध्यमबाट समाधान गर्नुपर्नेमा बैठकले जोड दिएको कांग्रेस प्रमुख सचेतक श्याम घिमिरेले जानकारी दिए।

आन्दोलनकारी पक्षसँगको वार्ता निष्कर्षमा नपुगेसम्मलाई निर्माणकार्य स्थगित गर्ने सरकारको कदम स्वागतयोग्य रहेको पनि घिमिरेले बताएका छन् ।

त्यस्तै बैठकमा निर्वाचनसम्बन्धी विधेयक, राजनीतिक दलसम्बन्धी विधेयक र संसद्‍मा अड्किएका ६ वटा अध्यादेशका बिषयमा पनि छलफल भएको उनले बताएका छन्। विधेयक निर्माणको काम सुस्त देखिएकाले तीव्रता दिनेबारे पनि छलफल भएको घिमिरेले बताएका छन् ।

त्यस्तै आसन्न स्ववियु निर्वाचनमा पार्टीको भ्रातृसंस्था नेपाल विद्यार्थी संघलाई बलियो उपस्थिति गराउने बिषयमा पनि छलफल भएको घिमिरेले जानकारी दिएका छन् ।