दार्चुला- दार्चुलामा नेपाली सेनामा कार्यरत एकजना जवानले आफ्नै घरमा आगो लगाएका छन् । सेनाका जवानले आगो लगाउँदा लाखौंको क्षति भएको छ ।

महाकाली नगरपालिका-३ बाँजका २८ वर्षीय गौरसिंह महराले बिहीबार (हिजो) राति आफ्नै घरमा आगो लगाएका हुन् ।

जिल्ला प्रहरी कार्यालय दार्चुलाका प्रहरी निरीक्षक छत्र बहादुर रावतका अनुसार आगो लगाउँदा ढुङ्गा र काठले बनेको ६ कोठे दुई तले घर जलेर नष्ट भएको छ ।

घरबिदामा आगो लगाएका ती सेनाका जवानको मानसिक अवस्था ठीक नरहेको दाबी स्थानीयबासीले गरेका छन् ।

आगोले जलेर गोठमा रहेका २ वटा गाई, ३ बाच्छा, ३ बाख्रा, एउटा बोका र २ कुकुरसहित ११ पशुचौपाया मरेका छन् ।

घटनाबारे शुक्रबार बिहान खबर आएको प्रहरीले जनाएको छ । जिल्ला प्रहरी कार्यालयबाट प्रहरी र सेनाको टोली घटनास्थलमा गएको प्रहरी निरीक्षक रावतले बताए ।

आगजनीमा संलग्न सेनाका जवान महरालाई प्रहरीले नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ ।