काठमाडौं- गत असार ३१ गते प्रधामन्त्रीमा पदमा फर्किन सफल नेकपा एमालेका अध्यक्ष केपी शर्मा ओलीसँग करिब दुईतिहाइ बहुमत छ ।

देशकै ठूलो दल नेपाली कांग्रेसकोसमेत साथ पाएका ओली आफ्नो पहिलो र दोस्रो कार्यकालमा जसरी काम गर्न सकिरहेका छैनन् ।

दोस्रो कार्यकालयमा भौतिक पूर्वाधार निर्माणमा उपलब्धि देखाउन सकेका उनी यो कार्यकालमा विचलित भएको जस्तो देखिन्छन् । सरकार शक्तिशाली छ तर जनतामा निराशा र सडकमा अराजकता बढ्दैछ ।

अधिकांश मन्त्रीहरूको पनि कामभन्दा धेरै विवाद छ । ऊर्जामन्त्री दीपक खड्का नेपाल विद्युत् प्राधिकरणका प्रबन्ध निर्देशक कुलमान घिसिङलाई हटाउन हात धोएर लागेका छन् ।

अन्य मन्त्रीहरूको पनि कार्यप्रगति पनि राम्रो छैन । प्रधानमन्त्रीकै कार्यालय कार्यप्रगति विवरणमा असफल भएको छ । यस्तो अवस्थामा कार्यशैली सुधार्ने भन्दा विभिन्न नाममा भाइरल भएकाहरूसँग बालुवाटारमा गनथन गरेर ओली बसेका छन् ।

पछिल्लो पटक उनले टिकटक लाइभमा बसेर ट्याप ट्याप गर्नू भन्ने अंश बर्मा र आफूलाई कलाकार रुपमा चिनाउँदै आएकी मिस पबीलाई भेटे । त्यसलगत्तै अहिलेका चर्चित गायक कुम: सागरलाई पनि बालुवाटार बोलाएर गीत सुने । उनले मीठो लयमा गीत सुनाए ।

कुम: सागर बालुवाटार छिरेपछि एमालेकै एकजना नेता राजीव पहारीले आफ्ना छोरालाई पनि लगेर ओलीलाई भेटाए । जहाँ पहारीका छोराले ओलीलाई बिट्स र र्‍याप सुनाए । उक्त भिडियो राजीव आफैंले फेसबुकमा हालेपछि भाइरल मात्रै भएन ‌ओलीको हाँसीमजाक पनि बनाइयो ।

दुईतिहाइ नजिकको सरकारको नेतृत्व यस्ता कुरामा अलमलिएर बस्दा देशको आर्थिक अवस्थाले न त गति लिन सकेको छ न त रोजगारी नै बढेको छ। त्यहीकारण यो सरकारले जनताको निराशा चिर्न नसकेको कुरा उठिरहेको छ ।

यिनै सन्दर्भलाई व्यंग्य गर्दै यो कार्टुनमार्फत् प्रधानमन्त्रीको कार्यप्रगति देखाउन खोजिएको छ । वास्तविक कार्यप्रगतिमा फेल ओली अहिले आफ्नै नामको केपी ओली कपसहितमा अल्झिएर बसेको सन्दर्भमा यस कार्टुनमार्फत् खबरदारी गर्न खोजिएको हो ।