हेटौंडा – मकवानपुरमा मोटरसाइकलको ठक्करबाट पैदल यात्रीको ज्यान गएको छ । बिहीबार बिहान करिब साढे ६ बजे हेटौंडा–४ कर्रा चोकस्थित पूर्व–पश्चिम राजमार्गमा पशुपतिनगरबाट हेटौंडातर्फ आउँदै गरेको ना।३८प ५८५० नं।को मोटरसाइकलले पैदल यात्रीलाई ठक्कर दिएको थियो ।

जिल्ला प्रहरी कार्यालय मकवानपुरका अनुसार मोटरसाइकलको ठक्करबाट वीरगञ्ज महानगरपालिका–१६ नागुवा घर भई हाल हेटौंडा–१० कर्रामा बसोबास गर्ने ५५ वर्षीया खुइली डोम गम्भीर घाइते भएकी थिइन् । उनलाई उपचारका लागि हेटौंडा अस्पतालमा पुर्याएपनि चिकित्सकले मृत घोषणा गरेका थिए ।

घटनास्थलमा तत्कालै प्रहरी टोली खटिएको र दुर्घटनामा संलग्न मोटरसाइकल तथा बारा सिम्रनगढ नगरपालिका- ११ का २५ वर्षीय चालक सुनिल ठाकुर लाई नियन्त्रणमा लिइएको प्रहरीले जनाएको छ। मृतकको शव हेटौंडा अस्पतालमै राखिएको छ।