काठमाडौं– प्रधानमन्त्री सुशीला कार्कीले जेन-जी आन्दोलनपछि बदलिएको राजनीतिक परिस्थितिबीच पहिलो पटक नेकपा एमालेसँग सिधा संवाद थालेकी छन् ।

नेकपा एमालेका अध्यक्ष केपी शर्मा ओली, नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल प्रचण्डले राजनीतिबाट बिदा लिनुपर्ने मत राखेकी उनले पहिलो पटक दोस्रो तहका नेतासँग सिधा संवाद गरेकी हुन् ।

उनीसँग संवादका लागि एमाले महासचिव शंकर पोखरेलसहितका नेताहरू बालुवाटार पुगेका छन् । गत भदौ २३ र २४ गते भएको जेन-जी आन्दोलनको उथलपुथलले एमाले अध्यक्ष एवम् तत्कालीन प्रधानमन्त्री केपी शर्मा ओली बालुवाटारबाट सेनाको हेलिकप्टरमा चढेर भाग्नु परेको थियो ।

त्यसपछि भदौ २७ गते अन्तरिम सरकारकी प्रधानमन्त्री बनेकी कार्की र तीन दलका शीर्ष नेताबीच संवाद हुन सकेको छैन । तर बुधबार एमालेले निर्वाचन आयोगमा दल दर्ता गरेसँगै कार्कीले नेताहरूलाई बालुवाटार बोलाएर संवाद गरेकी हुन्। यससँगै एमाले र अन्तरिम सरकारबीच पहिलो पटक वार्ताको ढोका पनि खुलेको छ।

बालुवाटारमा अहिे जारी संवादमा सरकारका तर्फबाट प्रधानमन्त्री सुशीला कार्की र सञ्चार तथा सूचना प्रविधि मन्त्री जगदीश खरेल सहभागी छन् ।

एमालेका तर्फबाट महासचिव पोखरेल, उपमहासचिव प्रदीप ज्ञवाली र पूर्वप्रमुख सचेतक महेश बर्तौला सहभागी छन्। कार्की गत भदौ २७ गते प्रतिनिधिसभा विघटन गर्दै अन्तरिम सरकारकी प्रधानमन्त्री भएकी हुन् । उनले फागुन २१ गते कुनै हालतमा चुनाव गर्ने बताएकी छन् ।

तर पछिल्लो समय जेन-जीहरू र एमालेबीच मुठभेटको अवस्था बनिरहेका बेला सरकारले संवाद थालेको हो । एमालेले यो सरकारविरुद्ध सर्वोच्च अदालतमा रिटसमेत दायर गरेको छ।