काठमाडौं – नायक रेयर राईलाई शीर्ष भूमिकामा लिएर निर्माता किरण नेपालीले फिल्म निर्देशनमा डेब्यू गर्ने भएका छन् ।

किरणले जमलमा बुधबार एक कार्यक्रमको आयोजना गरी फिल्म ‘महादशा’ निर्माणको औपचारिक घोषणा र आफूले निर्देशनमा डेब्यू गर्ने जानकारी दिएका हुन् ।

उक्त कार्यक्रममा फिल्मको प्री–टिजर सार्वजनिक गरिएको थियो । त्यसमा भने कलाकार प्रमोल अग्रहरी, प्रेमा लामगाढे र हाकिम गुरुङलाई प्रस्तुत गरिएको छ । हाकिमले कलाकारको रुपमा यही फिल्मबाट डेब्यू गर्दैछन् ।

निर्माण पक्षले शीर्ष नायक मध्येका एक रेयरलाई मात्रै सार्वजनिक गरिएको छ । अन्य दुई शीर्ष नायकको भने सार्वजनिक गर्न बाँकी रहेको बुझिएको छ । निर्माण पक्षले पनि अन्य कलाकारहरु बिस्तारै सार्वजनिक गर्ने बताएको छ ।

किरण फिल्म निर्माणमा संलग्न थिए । यसबाट उनले निर्देशनको नयाँ अध्याय सुरु गरेका हुन् ।

उनका अनुसार यो फिल्मको छायाङ्कन मिति चाँडै नै टुंगो लाग्नेछ । छायाङ्कन पूरा भएपछि मात्रै प्रदर्शन मिति सार्वजनिक गर्ने योजनामा उनी रहेका छन् ।

मनिष गौतमले यो फिल्म लेखेका हुन् । निर्माण पक्षका अनुसार संस्कृति, अध्यात्म, समाजमा विद्यमान रहस्यमय घटनाक्रम, मानिसको जीवनमा ग्रह–नक्षत्र र कर्मको प्रभावलाई समेटेर यस फिल्मको कथा लेखिएको छ ।

लेकाली इन्टरटेन्मेन्टले ब्यानरमा बन्ने यस फिल्मको निर्माता राज के. शाह, श्याम मगर र अमला देवी राई हुन् ।