काठमाडौं– देशभर मनसुनी प्रणाली सक्रिय भएको डेढ महिना भएपनि मधेस प्रदेशका आठ जिल्लाहरूमा वर्षा हुन सकेको छैन । समयमै वर्षा नभएपछि यहाँका किसानहरूले चरम खडेरी र सुख्खा झेल्नु परेको छ ।

धान रोपाइँका लागि वर्षाको पानीको भर पर्नु पर्ने यहाँका किसानहरूले पानीको अभावका कारण श्रावण महिनाको दोस्रो साता हुँदा पनि रोपाइँ गर्न पाएका छैनन् ।

सुख्खा र खडेरीका कारण असार २६ गते मधेस प्रदेश सरकारले मधेशका आठ जिल्लालाई सुख्खाग्रस्त क्षेत्र घोषणा गरेको थियो भने साउन ७ गते बसेको संघीय सरकारको मन्त्रिपरिषद बैठकले पनि मधेश प्रदेशलाई विपद् संकटग्रस्त क्षेत्र घोषणा गरेको छ ।

मधेस प्रदेशका विभिन्न जिल्लाहरुमा पानीको अभावका कारण समयमै रोपाइँ हुन सकेको छैन भने रोपाइँ गरिसकेका खेतहरू पनि धाँजा फाट्ने, धानको बीउ सुक्ने जस्ता समस्या किसानहरूले झेलिरहनु परेको छ ।

हरेक वर्ष मलखादको अभाव झेल्दै आएका मधेशका किसानहरूले यो वर्ष भने सुख्खा र खडेरीको समेत सामना गर्नु परेको छ ।

तस्बिरहरू : नेपाल फोटो लाइब्रेरी