चितवन– नेपाली कांग्रेसका सभापति शेरबहादुर देउवाले सत्ता साझेदार नेकपा एमालेसँग कुनै असमझदारी नभएको बताएका छन् ।
 
चितवनको भरतपुर विमानस्थलमा पत्रकारहरूसँगको संक्षिप्त कुराकानीमा उनले एमालेसँग असमझदारी नभएको प्रतिक्रिया दिएका हुन् । 

सभापति देउवालाई पत्रकारहरूले एमालेसँग नेपाल राष्ट्र बैंकको गभर्नर नियुक्तिमा देखिएको असमझदारीतर्फ ईंगित गर्दै जिज्ञासा राखेका थिए । जवाफमा उनले भने, ‘ठूलो कुरो केही थिएन । मानी हाले नि । दुईवटा पार्टी अलग–अलग पार्टी हुन् ।’

पत्रकारकै जिज्ञासाका क्रममा सभापति देउवाले पार्टीको १५ औँ महाधिवेशन समयमै हुने पनि बताए । ‘समयमा हुन्छ, समयमा हुन्छ,’ उनले भने । 

प्रजातन्त्रका सेनानी गौरीदेवी प्रधानको निधनको ७ औँ पुण्यतिथिको अवसर पारेर कांग्रेस चितवनले आयोजना गरेको श्रद्धाञ्जली सभामा सहभागी हुन देउवा चितवन पुगेका छन् ।