काठमाडौं – लिभरपुलको विजय जुलुसको भीडमा कार प्रवेश गर्दा दर्जनौँ घाइते भएका छन्। यसरी घाइते हुनेमध्ये चार जना बालबालिका छन्। घाइतेमध्ये २७ जना अस्पताल लगिएका छन्। घाइतेमध्ये दुई जनाको अवस्था गम्भीर रहेको अन्तर्राष्ट्रिय सञ्चार माध्यमले जनाएका छन्।

शङ्कास्पद मानिएका कार चालक भएको आरोपमा एक ५३ वर्षीय पुरुषलाई गिरफ्तार गरिएको छ। यो घटना आतङ्कवादी घटनासँग सम्बन्धित नभएको बताइए पनि अनुसन्धान भइरहेको छ।

लिभरपुलले इङ्लिस प्रिमियर लिगमा जित हात पारेपछि सहरमा विजय यात्रा गरिएको थियो। प्रधानमन्त्री केइर स्टेइमरले सो घटनाको दृश्य दुखदायी भएको बताएका छन्। उनले सिङ्गो देश लिभरपुलको साथमा रहेको प्रतिक्रिया दिएका छन्।

लिभरपुल सहरका काउन्सिल नेताले उद्धार कार्यमा संलग्न हुनेको प्रशंसा गरेका छन्। प्रशासनले घटनाको कुनै फुटेज सामाजिक सञ्जालमा पोस्ट नगर्न उल्लेख गरेको छ। सो घटनामा चार जना गाडीमा नै थिचिएका छन्।