काठमाडौं – जसप्रीत बुमराहको शान्दार प्रदर्शनमा मुम्बई इन्डियन्सले लखनऊ सुपर जायन्ट्सलाई ५४ रनले पराजित गरेको छ।

लखनऊले टस जितेर पहिले बलिङ गर्ने निर्णय गरेको थियो । यस्तोमा पहिले ब्याटिङको निम्तो पाएको मुम्बईका लागि सूर्यकुमार यादव र रियान रिक्लेटनले अर्धशतकीय पारी खेले । दुवैको अर्धशतकीय मद्दतले मुम्बईले २० ओभरमा ७ विकेट गुमाउँदै २१५ रन बनायो । जवाफी ब्याटिङमा उत्रिएको लखनऊको टोली २० ओभरमै १६१ रनमा समेटियो।

मुम्बईका लागि जसप्रीत बुमराहले ४ ओभरमा २२ रन खर्चेर ४ विकेट लिएर चट्काए। उनले यससँगै लसिथ मलिङ्गालाई पछि पार्दै फ्रेन्चाइजका सबैभन्दा सफल बलर बने। ट्रेन्ट बोल्टले ३ विकेट, विल ज्याक्सले २ विकेट र कोभिन बोशले १ विकेट लिए।

लखनऊका लागि एडेन मार्करम, निकोलस पुरन, कप्तान, मिचेल मार्श, डेभिड मिलर लगायतका ब्याट्सम्यानले आशा जगाए पनि मुम्बईको कडा बलिङसामु टिक्न सकेनन्।

पछिल्लो समयमा रवि बिश्नोईले दुई छक्का प्रहार गरेर संघर्ष गरे पनि लखनऊले हार टार्न सकेन । मुम्बईले जारी सिजनमा लगातार पाँचौँ जित निकालेको छ । यससँगै मुम्बई १२ अंकसिहत तालिकाको दोस्रो स्थानमा पुगेको छ ।