काठमाडौं- एकजना अमेरिकी नागरिकलाई मुस्ताङको मुक्तिनाथ दर्शन गर्न आएको अवस्थामा पोखराबाट अपहरण गरी बन्धक बनाएको अभियोगमा एकजना महिला पक्राउ परेकी छन् ।

नुवाकोटको बेलकोटगढी नगरपालिका–४ बस्ने ३७ वर्षीया सरिता लामालाई प्रहरीले पक्राउ गरेको हो ।

आफ्नो साथीहरूसँग मुक्तिनाथ मन्दिर भ्रमण आई कास्की पोखरा महानगरपालिका–६ लेकसाइडस्थित होटलमा बस्दै गरेकी ७० वर्षीया अमेरिकी महिलाको सोमबार अपहरण गरी फिरौतीस्वरूप ३ लाख युरो मागेको आरोपमा उनी पक्राउ परेकी हुन् ।

अपहरण भएको सूचनाको आधारमा जिल्ला प्रहरी कार्यालय कास्कीको प्रहरीले केन्द्रीय अनुसन्धान ब्यूरो र जिल्ला प्रहरी कार्यालय मकवानपुरको सहकार्यमा हेटौंडा उपमहानगरपालिका–१९ नेवारपानीबाट ती महिलाको सकुशल उद्दार गरेको छ।

पक्राउ परेकी सरिताविरुद्ध अपहरण तथा शरीर बन्धक कसुरमा जिल्ला अदालत कास्कीबाट ७ दिन म्याद थप अनुमति लिई अनुसन्धान भइरहेको छ ।