एजेन्सी – अमेरिकी राष्ट्रपति डोनाल्ड ट्रम्पले सर्ट भिडियो एप टिकटक बिक्री गर्न चीनसामू एक प्रस्ताव राखेका छन् । टिकटक गैरचिनियाँ क्रेतालाई बेच्ने समयसीमा बढाउन आफू तयार रहेको ट्रम्पले बताएका हुन् ।
चिनियाँ एप टिकटकमाथि अमेरिकाले प्रतिबन्ध लगाउने र चल्न नदिने बताएपछि दुई आर्थिक महाशक्तिबीच तनाव थपिएको छ ।
यसअघि अमेरिकी राष्ट्रपति जो बाइडेन प्रशासनले अमेरिकामा टिकटक प्रतिबन्ध लगाउन एक कानून पारित गरेको थियो । तर, जनवरीमा ट्रम्प सत्तामा आएपछि उक्त कानून लागू गर्न हतारो देखाएका छैनन् ।
सो कानून सन् २०२४ मा तयार गरिएको थियो । राष्ट्रिय सुरक्षालाई कारण देखाउँदै चिनियाँ टिकटक एपमा प्रतिबन्ध लगाउन या बेच्न यो कानूनमा प्रस्ताव गरिएको छ ।
टिकटक एप बिक्री सुनिश्चित गर्न चीनमाथि लगाइएको करमा अमेरिकाले छुट दिनसक्ने ट्रम्पले बताएका हुन् । टिकटकको मालिक चिनियाँ कम्पनी बाइटडान्स हो ।
ट्रम्पले गैर चिनियाँ खरिदकर्ता खोज्ने समयसीमा अप्रिल ५ सम्म लम्ब्याउन आफू तयार रहेको पनि बताएका छन् । उनले पत्रकारहरूलाई भनेका छन्, ‘टिकटकबारे चीनले नै आवश्यक भूमिका निभाउनुपर्छ । उसले त्यो भूमिका निभाउँछ भन्ने मलाई लाग्छ । यसका लागि करमा केही कटौती या अन्य उपाय अपनाउन सकिन्छ, ता कि टिकटक गैर चिनियाँ क्रेताले खरिद गर्न सकुन् ।’
अप्रिल ५ सम्मको समयसीमाभित्र टिकटक बिक्रीबारे आवश्यक सम्झौता तयार हुने आफ्नो विश्वास रहेको ट्रम्पले बताएका छन् ।
चिनियाँ स्वामित्वलाई नरुचाएका अमेरिकी जनप्रतिनिधिहरूले बाइट डान्सले टिकटक गैरचिनियाँलाई नै बेच्नुपर्ने शर्त राखेका छन् । तर, चिनियाँ अधिकारीहरूले अमेरिकाको यस्तो सर्त मान्न नसकिने बताइसकेका छन् ।
यो पनि –
टिकटक नबेचे प्रतिबन्ध लगाउने गरी अमेरिकी संसदले पारित गर्यो विधेयक
प्रतिक्रिया