काठमाडौं – जेन–जी मुभमेन्ट नेपालले जेन–जी विद्रोहका क्रममा नवोदित पुस्ताले उठाएका राजनीतिक तथा शासकीय मुद्दाहरू हालसम्म सम्बोधन नभएको भन्दै आपत्ति जनाएको छ ।

मुभमेन्टले बिहीबार प्रेस वक्तव्य जारी गर्दै समस्याको जड नछोई देशलाई जबरजस्ती निर्वाचनतर्फ धकेल्दा सामाजिक द्वन्द्व अझ गहिरिने र गृहयुद्धको खतरा बढ्ने उल्लेख गरेको छ। भाद्र २३ र २४ गते नवोदित पुस्ताको आह्वानमा भएको जेन्जी विद्रोहलाई गहिरो राजनीतिक जागरणको अभिव्यक्ति भन्दै त्यसबाट उठेका माग र चेतनालाई संविधानमा संस्थागत नगरेसम्म संघर्ष जारी रहने स्पष्ट गरिएको छ।

वक्तव्यमा वर्तमान सरकारले राजनीतिक तथा नैतिक वैधता गुमाइसकेको दाबी गर्दै तत्काल सत्ता छोड्नुपर्ने माग गरिएको छ। देशलाई विद्यमान संवैधानिक र राजनीतिक संकटबाट मुक्त गर्ने एकमात्र विकल्प सर्वपक्षीय सरकार निर्माण र सर्वपक्षीय सहमतिमार्फत नयाँ राजनीतिक निकास खोज्नु रहेको जेन्जी मुभमेन्टको ठहर छ।

यसै सन्दर्भमा नेत्रविक्रम चन्द नेतृत्वको माओवादीले अघि सारेको सर्वपक्षीय सहमतिमा आधारित सरकार निर्माणको प्रस्तावलाई सकारात्मक रूपमा लिइएको जनाइएको छ। जेन्जी विद्रोहका मुद्दाहरू पूरा गराउन रूपान्तरणको पक्षमा उभिने जुनसुकै समूह, दल वा व्यक्तिसँग सहकार्य गर्न जेन्जी मुभमेन्ट नेपाल तयार रहेको वक्तव्यमा उल्लेख छ।

मुभमेन्टका अनुसार यो संघर्ष सत्ता परिवर्तनका लागि मात्र नभई राज्यको चरित्र परिवर्तनका लागि हो। प्रेस वक्तव्यमा प्रवक्ता विजय शाहले जेन्जी आन्दोलनलाई निर्णायक चरणमा पुर्‍याउने प्रतिबद्धता व्यक्त गर्दै ‘लङ लिभ जेन्–जेड मुभमेन्ट नेपाल’ भन्ने नारासमेत उल्लेख गरेका छन्।