काठमाडौं- पाकिस्तानको बलोचिस्तानमा मानव अधिकारको क्षेत्रमा अभियान सञ्चालन गर्दै आएको बलोच याकजेठी समितिले प्रान्तमा जबरजस्ती बेपत्ता पारिने घटनामा वृद्धि भइरहेकोमा निन्दा गरेको छ । हालै बलोचिस्तानको हुब क्षेत्रमा १५ वर्षीया बालिकालाई जबरजस्ती बेपत्ता पारिएको घटना सार्वजनिक भएसँगै समितिले निन्दा गरेको हो ।

अवरन क्षेत्रमा हुर्किएकी १५ वर्षीया नसरिना बलोचलाई हुबमा आफ्नै परिवारसँग रहेका बेला सुरक्षाकर्मीले अपहरण गरेको समितिले जनाएको छ । राति घरमा बसिरहेका बेला पाकिस्तानी सुरक्षा बल र जासुसी एकाईले छापा मारेर उनको अपहरण गरेको जनाइएको छ ।

समितिका अनुसार छापा मार्ने क्रममा उनका परिवारलाई सुरक्षाकर्मीले डर त्रास देखाएको र नसरिनालाई अज्ञात स्थलमा लगिएको थियो । उनको अवस्थाबारे कुनै जानकारी नदिइएकाले परिवार अझै पनि तनाव र त्रासमा रहेको समितिले उल्लेख गरेको छ ।

यसअघि पनि बलोचिस्तानमा सुरक्षाकर्मीले स्वतन्त्र बलोचिस्तानको माग राखी पृथकतावादी गतिविधि सञ्चालन गरेको भन्दै सयौँ नागरिकलाई बेपत्ता पार्दै आएको बलोचवर्नाले जनाएको छ ।

सात महिनाअघि पनि बलोचिस्तानको राजधानी क्वेट्टामा रहेको एउटा होस्टेलबाट पोलियो रोगले ग्रस्त माह जबिन बलोच नाम गरेकी एक जना विद्यार्थीलाई सुरक्षाकर्मीले अपहरण गरेका थिए । उनको अवस्था अझै पनि अज्ञात नै छ ।