काठमाडौं- नेपाली कांग्रेसकी सांसद ईश्वरी न्यौपानेले संसदीय सुनुवाइ समितिको सभापतिको पदबाट राजीनामा दिएकी छिन् । पार्टीले राज्य व्यवस्था तथा सुशासन समितिको सभापति बनाउने निर्णय गरेसँगै न्यौपानेले सुनुवाइ समितिको सभापतिबाट राजीनामा दिएकी हुन् ।

सभामुख देवराज घिमिरेलाई पत्र लेख्दै सांसद न्यौपानेले सुनुवाइ समितिको सभापतिबाट राजीनामा दिएको जानकारी दिएकी छिन् ।

‘संघीय संसदको संयुक्त बैठक र संयुक्त समिति (कार्यसञ्चालन) नियमावली, २०८० को नियम २५ बमोजिम गठित संसदीय सुनुवाई समितिको सभापति पदमा रही रहन विशेष कारणले म असमर्थ भएको अवगत गराउँदै आजै÷तत्काल लागू हुने गरी समितिको सभापति पदबाट राजीनामा गरेको बेहोरा अनुरोध गर्दछु ।’ उनले लेखेको पत्रमा उल्लेख छ ।

यसअघि सभापति शेरबहादुर देउवानिवास बूढानीलकण्ठमा मङ्गलबार बसेको कांग्रेसको पदाधिकारी बैठकले न्यौपानेलाई समितिको सभापति बनाउने निर्णय गरेको थियो ।

सङ्घीय निजामति सेवा विधेयक, २०८० मा समितिले ‘कुलिङ पिरियड’मा गरेको सर्वसम्मत व्यवस्थामा छेडखानी भएपछि काँग्रेस सांसद रामहरि खतिवडाले राजीनामा दिएका थिए । त्यसयता उक्त पद रिक्त छ ।