काठमाडौँ- पूर्वराष्ट्रपति विद्यादेवी भण्डारीले सहकारी ठगी मुद्दामा नख्खु कारागारमा रहेका राष्ट्रिय स्वतन्त्र पार्टीका सभापति रवि लामिछानेबारे चासो व्यक्त गरेकी छन् ।

मंगलबार बिहान रास्वपा प्रवक्ता मनिष झासँग भंगालमा भएको डेढ घण्टा लामो भेटवार्ताका क्रममा उनले सहकारीको समस्या समाधानको साटो रविको मुद्दालाई राजनीतिकरण गरिनु अनुचित भएको बताएकी हुन् ।

रास्वपा प्रवक्ता झाले रवि प्रकरणलाई अनावश्यक राजनीतिकरण गरिएकोप्रति पूर्वाराष्ट्रपतिबाट चासो व्यक्त भएको जानकारी दिए ।

‘सहकारीको विषयमा समाधान गर्नुको साटो यसलाई अनावश्यक राजनीतिक मुद्दा बनाएकोप्रति उहाँले सरोकार राख्नुभयो’, झाले पूर्वराष्ट्रपतिसँगको भेटपछि भनेका छन्, ‘पूर्वराष्ट्रपतिज्यूले सभापति रवि लामिछानेप्रति सद्भाव रहेको पनि बताउनु भयो।’

झाले यो भेटलाई एउटा राजनीतिक शिष्टाचारको अभ्यास भनेका छन् । ‘राजनीतिक शिष्टाचारस्वरुप यो भेटघाट भएको हो’, उनले भने, ‘कुनै विशेष एजेन्डाभन्दा पनि राजनीतिक संवादको सुरुवात स्वरूप उहाँसँग भेटघाट भएको हो ।’