काठमाडौं– रुसले युक्रेनमा ड्रोन आक्रमणलाई जारी राखेकोमा अमेरिकी राष्ट्रपति डोनाल्ड ट्रम्पले असन्तुष्टि व्यक्त गरेका छन् । उनले आफू रुसी समकक्षी भ्लादिमिर पुटिनसँग बेखुश रहेको उनले बताए ।

न्यूजर्सी राज्यको मोरिसटाउन शहरबाट राजधानी वाशिङ्टन डीसी जाने क्रममा विमानस्थलमा सञ्चारकर्मीसँग कुराकानी गर्दै उनले यस्तो बताएका हुन् । ‘मलाई थाहा छैन, उहाँलाई के समस्या छ ? उहाँलाई के भएको छ ? हो ? उहाँले धेरै मान्छेको हत्या गरिरहनुभएको छ । म यसबारे खुशी छैन ।’ उनले भने ।

हालै रुसले युक्रेनी भूमिमा ३ सय ६७ वटा चालकरहित हवाइ उपकरण ड्रोन आक्रमण गरेपछि ट्रम्पको यस्तो भनाइ आएको हो । रुसी आक्रमणमा १२ जनाको ज्यान गएको छ भने अरु दर्जनौँ घाइते भएका छन् ।

ट्रम्पले रुस र युक्रेनबीच युद्धविराम गराउने प्रयास गरिरहेका छन् । गत सातामात्रै उनले पुटिनसँग दुई घण्टा टेलिफोन वार्ता गरेका थिए ।