काठमाडौं- नेपाल विद्युत् प्राधिकरणका प्रबन्ध निर्देशक कुलमान घिसिङलाई बर्खास्त गरेको प्रकरणमा सडकबाट तातेको माहोल सदनसम्मै पुगेको छ।

सोमबारको मन्त्रिपरिषद् बैठकले कुलमानलाई बिदा गरेर हितेन्द्रदेव शाक्यलाई प्रबन्ध निर्देशक बनाएसँगै सडकदेखि सदनसम्म तातेको हो ।

बुधबार बसेको प्रतिनिधिसभाको बैठक नेकपा माओवादी केन्द्र, राष्ट्रिय स्वतन्त्र पार्टी र राष्ट्रिय प्रजातन्त्र पार्टीसहितका विपक्षीले सरकारको उक्त कदमको विरोध गर्दै सदन अवरुद्ध पारेका छन् ।

उनीहरूले कुलमानलाई बर्खास्ती प्रकरणमा प्रधानमन्त्री केपी शर्मा ओलीले जवाफ दिनुपर्ने माग गरेका छन् । तर विपक्षीले सदनमा अवरोध गरिरहँदा प्रधानमन्त्री ओली भने बालुवाटारमा सत्तारुढ गठबन्धनको बैठकमा व्यस्त थिए ।

गठबन्धनको बैठकले गत माघ २ गते जारी भएको भूमिसम्बन्धी अध्यादेश फिर्ता लिने निर्णय गरेको छ । उता कुलमानलाई कांग्रेस र एमाले दुवै मिलेर हटाएकाले अब त्यसमा पुनर्विचार नगर्ने पक्षमा सत्ता गठबन्धन अडीग देखिएको छ।