काठमाडौं– मनसुनी वर्षाले देश छोडे सँगसँगै चिसो हावाको सिरेटो सुरु भएको छ । यो चिसो मौसमसँगै आएका छन् बसाइँ सर्ने चराहरू । बसाइसराइ वर्षेनी १०० भन्दा बढी प्रजातिका चराहरू नेपाल आउने गर्छन ।

त्यसमा पनि धेरैजसो पानी चरा र हाँसहरू हुन्छन । चिल, बाज, फिस्टे, गिद्ध जस्ता अरु चराहरू पनि उपयुक्त मौसम को खोजीमा नेपाल आइपुग्ने गर्छन । 

हालसम्म ९०० भन्दा बढी प्रजातिका चराहरू नेपालमा अभिलेख भएका छन् । कयौं प्रजातिका चराहरू नेपालमा विश्राम मात्र गरेर अन्य देशहरूमा जाने गर्छन भने कर्‍याङकुरुङ जस्ता अन्य कयौँ प्रजातिका चराहरू नेपालमा विश्राम नगरी आकाशबाटै  भारततर्फ जाने गर्छन ।

जाडो याममा नेपाल आउने चराहरूले कोशी, कर्णाली, नारायणी, राप्ती, फेवा ताल, जगदिसपुर ताल, घोडाघोडी ताल, बर्जु ताल जस्ता ठूला ठूला नदी र पोखरीहरूमा बस्न रुचाउने गर्छन् । हरेक वर्ष जनवरी महिनामा देश वरिपरिका प्रमुख वासस्थानहरूमा बसाइँ सरेर आउने पनि चराहरूको गणना हुन्छ र लाखौँको सङ्ख्यामा अभिलेख गरिन्छ ।  

चखेवा, खोया हाँस्, आसिढुँडे, ध्वाँसे फिस्टो, खड्खडे हाँस, सुइरोपुच्छ्रेजस्ता चराहरु ठूलो सङ्ख्यामा नेपाल आउने गर्छन भने श्वेतमाथा कलहाँस, देवदुत मनितुन्दक, देवहाँस जस्ता चरा भने निकै कम सङ्ख्यामा आउने गर्छन् ।