काठमाडौं – केदार घिमिरे ‘माग्ने बूढा’को फिल्म ‘माग्ने राजा’ भदौं ६ मा प्रदर्शनमा आउँदैछ । निर्माता मुनाल घिमिरेका अनुसार केदारले यस फिल्मका लागि ६१ लाख पारिश्रमिक लिएका छन् ।

केदारले पनि यो कुरालाई स्वीकार गरेका छन् । तर, सम्झौता भए जति सबै रकम आफूले बुझिनसकेको उनको भनाइ छ ।

एक फिल्मबाट पारिश्रमिकवापत् ६१ लाख योभन्दा पहिला कुनै कलाकारले लिएका थिएनन् । यस अर्थमा अहिले केदार नेपाली फिल्म क्षेत्रका सबैभन्दा महँगा कलाकार हुन् ।

‘छक्का पञ्जा’ टिमले फिल्म निर्माणमा विश्राम लिएको छ । त्यसैले केदार भटाभट बाहिरी फिल्म साइन गरिरहेका छन् । उनको अभिनय रहेको फिल्म ‘जेरी अन टप’ र ‘माइती घर’ प्रदर्शनमा आउन बाँकी छ ।

यी दुवै फिल्मको छायाङ्कन सकिएको छ । अर्थात्, केदारको प्रदर्शनमा आउन बाँकी फिल्मको संख्या तीन वटा पुगिसकेको छ ।

अहिले फेरि केदारले फिल्म ‘जहाजै’मा साइन गरेका छन् । निर्माण पक्षले मंगलबार उनी अनुबन्ध भएको सार्वजनिक गरेको हो ।

निर्माण पक्षका अनुसार केदार शीर्ष भूमिकाका लागि अनुबन्ध भएका हुन् । निर्देशक कृषा चौलागाईंले भन्छिन्, ‘उहाँ सबैले रुचाएको कलाकार हो । महत्त्वपूर्ण भूमिकाका लागि उहाँलाई लिएका हौं ।’

यो फिल्ममा जापानी अभिनेतृ रुजेल इचिमिया अनुबन्ध भइसकेकी छन् । यो फिल्म मल्टिस्टारर बन्ने निर्माण पक्षले बताएको छ । केही कलाकारसँग कुरा भइरहे पनि फाइनल नभएको निर्माण पक्षले बताएको छ ।

यूएनए प्रोडक्सनको ब्यानरमा बन्ने यो फिल्मको छायाङ्कन भदौबाट सुरु हुने बताइएको छ । फिल्मलाई नेपाल, जापान र फिलिपिन्समा खिचिनेछ । यो फिल्मका निर्माता उज्जवल गुरागाईं हुन् ।