काठमाडौं– नेपाल राष्ट्र बैंकले चालु आर्थिक वर्षको मौद्रिक नीतिको तेस्रो समीक्षा जारी गरेको छ । नवनियुक्त गभर्नर डा विश्वनाथ पौडेलले कार्यभार सम्हालेसँगै जारी गरिएको समीक्षाले केही नीतिगत परिवर्तन समेत गरेको हो ।

मौद्रिक नीति समीक्षाले शेयर कर्जामा कायम रहेको १२५ प्रतिशत जोखिमभारलाई घटाएको छ । त्यस्तै, वित्तीय प्रणालीको विद्यमान तरलताको अवस्था र पछिल्लो समय यस बैंकले खुला बजार कारोबार उपकरणहरुमा गरेको सुधारलाई मध्यनजर गरी बैंक तथा वित्तीय संस्थाहरूले दैनिक ९० प्रतिशत न्यूनतम अनिवार्य नगद मौज्दात कायम राख्नुपर्ने व्यवस्था गरिने मौद्रिक नीतिको समीक्षामा उल्लेख छ ।

राष्ट्र बैंकले अन्य नीतिगत व्यवस्थाहरूलाई भने यथावत राखेको छ । साथै ‘नेपाल राष्ट्र बैंक विदेशी लगानी तथा विदेशी ऋण व्यवस्थापन विनियमावली २०७८’ र बैंकिङ कसुर तथा सजाय ऐन, २०६४ को संशोधनबमोजिम चेक अनादरसम्बन्धी व्यहोरा प्रमाणित गर्ने कार्यविधि तर्जुमा गरी जारी गरिने समीक्षामा उल्लेख छ ।