काडमाडौं– २०७२ वैशाख १२ गते गोरखाको बारपाक केन्द्रविन्दु भएर भूकम्प गएको १० वर्ष पूरा भएको छ । विनाशकारी भूकम्पले धार्चे गाउँपालिका– ४ लाप्राकको ऐतिहासिक गुरुङबस्ती ध्वस्त बनाएको थियो ।

गैरआवासीय नेपाली संघ (एनआरएनए), तत्कालीन राष्ट्रिय पुनर्निर्माण प्राधिकरण, शहरी विकास मन्त्रालयबीच २०७३ वैशाख १२ गते त्रिपक्षीय सम्झौता भयो । जसअनुसार गोरखाको लाप्राकका भूकम्पपीडितका लागि निर्माण गरिएको एकीकृत नमूना बस्ती अझै खाली छ । धार्चे गाउँपालिका वडा नम्बर ४ गुप्सीपाखामा करिव ३२६ रोपनी क्षेत्रफलमा लाप्राकीका लागि नमुना बस्ती निर्माण गरिएको हो ।

कूल ६०४ घरधुरी रहेको नमूना बस्तीमा ५७३ घर गैरआवासीय नेपाली संघ (एनआरएनए) ले निर्माण गरेको हो भने बाँकी नेपाल सरकारको भूकम्प राहतबाट बनेको हो ।

बस्ती टाढाबाट हेर्दा सुन्दर र आकर्षक देखिए पनि वास्तविकता भने अलि फरक रहेको छ । अव्यवस्थित निर्माण, कच्चा र कमसल निर्माण सामग्रीको प्रयोग र परिवारको सङ्ख्या अनुसार घर निकै सानो रहेकाले लाप्राकीहरुको प्राथमिकतामा पर्दैनन् नमूना बस्तीका घरहरू । ६०४ घर रहेको सो बस्तीमा अहिले ६० परिवार मात्र बस्ने गर्दछन् ।