काठमाडौं– बीमा कम्पनीहरूले बीमा शुल्क आम्दानीमा वृद्धि गरेका छन् । अघिल्लो आर्थिक वर्ष (आव)को फागुन महिनासम्मको तुलनामा चालु आवको सोही अवधिमा सञ्चालनमा रहेका बीमा कम्पनीहरूको बीमा शुल्क आम्दानीमा १०.५६ प्रतिशतले वृद्धि भएको हो ।

बीमा प्राधिकरणले सार्वजनिक गरेको तथ्यांकअनुसार चालु आवको फागुन मसान्तसम्म जीवन बीमा कम्पनीहरूले १ खर्ब ९ अर्ब ४३ करोड ५३ लाख ७८ हजार रुपैयाँ बीमा शुल्क आम्दानी गरेका छन् । जबकी जीवन बीमा कम्पनीहरूले अघिल्लो आवको सोही अवधिमा यस्तो आम्दानी ९८ अर्ब ५९ करोड ६ लाख ६१ हजार रुपैयाँ मात्रै गरेका थिए । अघिल्लो आवको फागुन मसान्तसम्मको तुलनामा चालु आवको सोही अवधिमा जीवन बीमा कम्पनीहरूले ११ प्रतिशत बढी आम्दानी गरेका हुन् ।

त्यस्तै, चालु आवको समीक्षा अवधिसम्म सञ्चालनमा रहेका निर्जीवन बीमा कम्पनीहरूले २८ अर्ब ६० करोड ८४ लाख ६३ हजार रुपैयाँ बीमा शुल्क आम्दानी गरेका छन् । ती कम्पनीहरूले गत आवको सोही अवधिमा २६ अर्ब २६ करोड ८४ लाख ३४ हजार रुपैयाँ बीमा शुल्क आम्दानी गरेका थिए । निर्जीवन बीमा कम्पनीहरूले चालु आवको फागुन मसान्तसम्म गत आवको सोही अवधिको तुलनामा ८.९१ प्रतिशतले बीमा शुल्क आम्दानी वृद्धि गरेका हुन् ।

गत आवको तुलनामा चालु आवको फागुन मसान्तसम्म बीमा कम्पनीहरूले बीमालेख पनि बढी जारी गर्न सफल भएको प्राधिकरणको तथ्यांकमा उल्लेख छ । तथ्यांकअनुसार कम्पनीहरूले चालु आवको समीक्षा अवधिमा गत आवको सोही अवधिको तुलनामा जीवन, निर्जीवन, वैदेशिक रोजगार, म्यादी र लघु बीमालेखको सङ्ख्या बढी जारी गरेका हुन् ।

चालु आवको समीक्षा अवधिमा कम्पनीहरूले गत आवको सोही अवधिको तुलनामा जीवन, म्यादी तथा लघु र वैदेशिक रोजगार बीमालेख संख्या क्रमशः १.९१, १.७४ र २१.२४ प्रतिशतले बढाएका हुन् । त्यस्तै, चालु आवको समीक्षा अवधिमा निर्जीवन बीमा कम्पनीहरूको बीमालेख सङ्ख्या २० लाख ७३ हजार ४६३ पुगेको छ । जुन अघिल्लो आवको सोही अवधिको तुलनामा ५.२ प्रतिशतले धेरै हो ।