काठमाडौं– चालु आर्थिक वर्ष २०८१-०८२ को दोस्रो मौद्रिक नीतिको समिक्षाको बैठक साँझ ५ बजेपछि बस्ने भएको छ । गभर्नर महाप्रसाद अधिकारीको अध्यक्षतामा बस्ने नेपाल राष्ट्र बैंकको बोर्डको बैठक कार्यालय समय पछि बस्ने भएको हो । 

राष्ट्र बैंकका सूचना अधिकारी डिल्लीराम पोखरेलले कार्यालयपछि मात्र बैठक बस्ने जानकारी दिएका छन् ।

 ‘कार्यालय समयमा अन्य कर्मचारीको विदा भएपछि बोर्डको बैठक बस्ने हो’, पोखरेलले भने, ‘बोर्डले आजै मौद्रिक नीतिको समीक्षा सार्वजनिक गरिदिनुस् भने आजै नभए आज सार्वजनिक हुँदैन ।’

पोखरेलका अनुसार सम्भवतः आजै मौद्रिक नीतिको समीक्षा आउने सम्भावना उच्च रहेको छ ।

 ‘बोर्डको बैठकले गर्ने निर्णयको कुरा हो’, पोखरेलले भने, ‘सम्भवतः राष्ट्र बैंकको ववसाइडमा आजै सार्वजनिक होला ।’

राष्ट्र बैंकका गभर्नर महाप्रसाद अधिकारीको ५ वर्षीय कार्यकाल आगामी चैत २५ गते सकिँदै छ । अधिकारीको यो अन्तिम मौद्रिक नीति भएकाले गर्दा  पनि मौद्रिक नीतिको दोस्रो त्रैमासको समीक्षालाई चासोका रूपमा हेरिएको छ । 

गभर्नर अधिकारीको अन्तिम मौद्रिक नीति भएकाले गर्दा राम्रो नीतिहरू ल्याउन सक्ने भन्दै चर्चा चलाईएको छ । त्यही चर्चाले गर्दा फागुन ४ गते यता निरन्तर शेयर बजार पनि बढिरहेको छ ।