काठमाडौं- नेकपा एमालेको भ्रातृसंगठन अनेरास्ववियुका उपाध्यक्ष धर्म गिरीले जनवादी प्रगतिशील विवाह गरेर जोगाएको खर्चले विद्यालयमा अक्षयकोष स्थापना गरेका छन् ।

उपाध्यक्ष गिरी र अनेरास्ववियु केन्द्रीय सदस्य इन्जिनियर रचना सापकोटाबीच एमाले केन्द्रीय कार्यालय च्यासलमा गत फागुन ८ गते जनवादी विवाह भएको थियो ।

त्यसपछि बिहे खर्च जोगाएको रकममध्ये प्युठानको नारिकोटस्थित अमृत जीवन माध्यमिक विद्यालयमा एक लाख ११ हजार १११ रुपैयाँको अक्षयकोष स्थापना गरिएको गिरीले बताए ।

गिरीले बिहेमा अनावश्यक खर्च गरेर ऋणको भारी बोक्ने तनावबाट जोगिएर बचेको पैसाले विद्यालयमा अक्षयकोषको स्थापना गरेको बताए । त्यही विद्यालयबाट गिरीले आधारभूत शिक्षा लिएका थिए ।

उक्त अक्षयकोषबाट आउने ब्याजबाट अब प्रत्येक वर्ष गरिब तथा जेहेन्दार विद्यार्थीलाई छात्रवृत्ति दिने पनि उनले जानकारी दिए ।

कुनै बेला कम्युनिस्ट पार्टीहरूमा जनवादी विवाह चर्चित थियो । यस्तोमा दुर्लभ जनवादी बिहे गरेर गिरी र सापकोटाले उदाहरणीय काम गरेको एमाले नेताहरूले बताएका थिए। उनीहरूलाई प्रधानमन्त्री एवम् एमाले अध्यक्ष केपी शर्मा ओलीसमेत उपस्थित भएर बरबधूलाई शुभकामना दिएका थिए ।