काठमाडौँ- कर्णाली याक्सका प्रमुख प्रशिक्षक राजु बस्न्यातले आशा गरिएका ब्याटरले राम्रो प्रदर्शन गर्न नसक्दा हार व्यहोरेको बताएका छन्।

सुदूरपश्चिम रोयल्ससँग नतिजा सुम्पिदै दोस्रो हार बेहोरेपछि कर्णालीका प्रशिक्षक बस्न्यातले मिडल अर्डरमा राम्रा ब्याटर रहेकाले पूरै २० ओभर खेल्दा लक्ष्य सहजै भेट्याउने खालको रहेको बताए।

उनीहरूले आफ्नो क्षमतानुरूप खेल्न नसक्दा राम्रो हार व्यहोर्नुपरेको उनको भनाइ छ। उनले ब्याटिङ गर्न असहज हुने खालको नरहेको स्पष्ट पारे। सुदूरपश्चिमले अन्तिम ५ ओभर खेल्दा नै ब्याटिङका लागि पिचले मद्दत गरेको उनले उल्लेख गरे।

प्रशिक्षक बस्न्यातले अझै चार खेल बाँकी रहेको र त्यसमा राम्रो गर्दै प्लेअफमा पुग्न मेहनत गर्ने आशा व्यक्त गरेका छन्।