काठमाडौं- गृह मन्त्रालयले तीन जना प्रहरी नायव महानिरीक्षक (डीआईजी) को सरुवा गरेको छ। मन्त्रालयको सोमबारको निर्णयअनुसार जनपद समूहका डीआईजीहरूको कार्यक्षेत्र परिवर्तन गरिएको हो।

नेपाल प्रहरी प्रधान कार्यालय, मानवश्रोत विकास विभागले जारी गरेको पत्रमा सरुवा भएका अधिकृतहरूको जिम्मेवारी पनि तोकिएको छ।

डीआईजी विनोद घिमिरेलाई नेपाल प्रहरी प्रधान कार्यालय, प्रशासन विभाग, आर्थिक प्रशासन तथा प्रबन्ध निर्देशनालय, नक्सालबाट कोशी प्रदेश प्रहरी कार्यालय, विराटनगरको प्रमुख बनाइएको छ।

उता अर्का डीआईजी दिलिप सिंह देउवालाई नेपाल प्रहरी प्रधान कार्यालय, अपराध अनुसन्धान विभाग, महिला, बालबालिका तथा ज्येष्ठ नागरिक सेवा निर्देशनालयबाट नेपाल प्रहरी प्रधान कार्यालय, प्रदेश समन्वय विभागमा सरूवा गरिएको छ।

अर्का डीआईजी दीपक कुमार बस्नेतलाई प्रदेश समन्वय विभागबाट अपराध अनुसन्धान विभाग, महिला, बालबालिका तथा ज्येष्ठ नागरिक सेवा निर्देशनालयमा सरूवा गरिएको छ ।

गृह मन्त्रालयबाट आएको पत्रसँगै नेपाल प्रहरी प्रधान कार्यालयले सरुवा कार्यान्वयनको लागि सम्बन्धित कार्यालयहरूलाई सूचना पठाएको छ।