काठमाडौं – कलाकार माओत्से गुरुङको लेखन र निर्देशनमा बन्न लागेको फिल्म ‘पेन्सनपट्टा’मा विश्वास गुरुङ र माया गुरुङ अनुबन्ध भएका छन् ।

विश्वास र माया गुरुङ फिल्मका चर्चित नायक-नायिका हुन् । उनीहरु फिल्ममा अनुबन्ध भएको निर्माण पक्षले बुधबार सार्वजनिक गरेको हो ।

विश्वासले ‘तिमी नभए’, ‘म्हो’, ‘कुटम्बेरी साइनो’, ‘फिच्यो’ र ‘सिरसुवा’मा अभिनय गरेका छन् । मायाले भने ‘ह्युल’ ‘च्यागी’, र ‘घलेक’मा अभिनय गरेकी छन् ।

नेपाली फिल्ममा यी दुवैको डेब्यू हो । उनीहरु महत्त्वपूर्ण भूमिकामा अनुबन्ध भएको निर्माण पक्षले बताएको छ । यसअघि नै फिल्मको शीर्ष भूमिकामा नायक दयाहाङ राई अनुबन्ध भइसकेका छन् ।

यो फिल्मको छायाङ्कन कात्तिकबाट सुरु गर्ने योजनामा माओत्से रहेका छन् ।

माओत्से गुरुङ फिल्मस्को ब्यानरमा बन्न लागेको यो फिल्मको छायाङ्कन पोखरा आसपासको क्षेत्रमा हुने बताइएको छ ।