काठमाडौं – बलिउड नायक सलमान खान पछिल्लो समय असुरक्षित बनेका छन् । उनलाई विभिन्न चरणमा ज्यान मार्ने धम्की आइरेहको छ ।

उनलाई आएको ज्यान मार्ने धम्कीको सन्देश भारतको कुख्यात लरेन्स बिश्नोई गिरोहबाट आएको प्रहरीले बताउँदै आएको छ ।

२०२४ अप्रिल १४ मा सलमानको घर ग्यालेक्सी अपार्टमेन्ट बाहिर गोली चलेको थियो । त्यस घटनामा मानवीय क्षति भने भएन ।

गोली चलेपछि भारत सरकारले सलमानको सुरक्षा बढाएको छ । सोहीकारण उनलाई फिल्म छायाङ्कनमा निस्कन कठिनाइ भइरहेको छ ।

अहिले फेरि सलमानको घरमा दुई अपरिचित व्यक्तिले प्रवेश गरेको खबर बाहिरिएको छ । ती व्यक्तिहरु छुट्टा छुट्टै दिनमा सलमानको घरमा पसेका हुन् ।

यसरी घरमा प्रवेश गर्न एक पुरुष र महिलालाई बान्द्रा प्रहरीले नियन्त्रणमा लिएको छ । पक्राउ पर्ने पुरुष छतिसगढका २३ वर्षीय जितेन्द्रकुमार सिंह हुन् ।

अपार्टमेन्टका सुरक्षा गार्डले जितेन्द्रलाई बिहान ९:४५ मा सलमानको घर वरपर शंकास्पद रुपमा घुमिरहेको भेट्याएका थिए । शंकास्पद लागेर गार्डहरुले सोधपुछ गर्दा उनले मोबाइल फुटाएर रिस देखाएका थिए । त्यसपछि गार्डहरु फिर्ता भएका थिए ।

उनै जितेन्द्र सोही दिन साँझ ७:१५ मा एक कारको पछाडि लुकेर अपार्टमेन्ट परिसरमा प्रवेश गरेपछि सुरक्षा गार्डले नियन्त्रणमा लिएर प्रहरीलाई बुझाएका थिए ।

जितेन्द्रलाई नियन्त्रणमा लिएकोभन्दा अघिल्लो दिन सोमबार यस्तै केसमा ३६ वर्षीया इशा छाबरा पक्राउ परेकी थिइन् ।

सलमान खानले निमन्त्रणा दिएर आएको भन्दै उनी अपार्टमेन्ट जबरजस्ती छिर्न खोजेकी थिइन् । उनलाई पनि प्रहरीको जिम्मा लगाइएको हो । सलमानको परिवारले झुट बोलेको बताएको छ । ती महिलाको अन्य विवरण भने गोप्य नै राखिएको छ ।

उनीहरुको अपार्टमेन्टमा छिर्ने प्रयासलाई बान्द्रा प्रहरीले सलमानमाथि आएको ज्यान लिने धम्कीसँग जोडेर अनुसन्धान गरिरहेको छ ।