काठमाडौं– निजी मेडिकल कलेजमा कार्यरत आवासीय चिकित्सकहरूले स्वास्थ्य तथा जनसंख्यामन्त्री प्रदीप पौडेलले आश्वासन दिएपनि आफ्नो माग सम्बोधन हुने नदेखिएको भन्दै आन्दोलन जारी रहने बताएका छन् । 

खबरहबसँग कुरा गर्दै नेपाल चिकित्सक संघका अध्यक्ष डा.अनिल विक्रम कार्कीले भने, ‘स्वास्थ्यमन्त्री पौडेलले माग सम्बोधन गर्ने आश्वासन दिएपनि विश्वस्त हुने आधार छैन ।’ माग पुरा नभएसम्म आन्दोलनका कार्यक्रम यथावत् रहने कार्कीले बताए । 

सरकारी सरह निर्वाह भत्ताको माग गर्दै निजी मेडिकल कलेजमा कार्यरत आवासीय चिकित्सकहरू विगत २९ दिनदेखी आन्दोलन गरिरहेका छन् । 

आन्दोलनकै क्रममा स्वास्थ्य मन्त्रालय घेराउ गर्न पुगेका उनीहरूलाई मन्त्री पौडेलले वार्तामा बोलाएर सरकारी सरह निर्वाह भत्ता दिनुपर्ने विषयमा चिकित्सा शिक्षा आयोगले निर्णय गरिसकेको र यो निर्णयबाट सरकार पछि नहट्ने बताएका छन् । 

निजी मेडिकल कलेजले पनि सरकारले तोके अनुसार रु ४८ हजार दिनु पर्ने निर्णय कार्यान्वयन गर्नुपर्ने र यदि नगरेको खण्डमा मन्त्रालयसँग सरोकार राख्ने कुनै पनि काम अघि नबढ्ने चेतावनी दिएका छन् ।