काठमाडौं– स्वास्थ्य तथा जनसङ्ख्या मन्त्रालयको सचिव र अतिरिक्त सचिव पद रिक्त भएको छ । स्वास्थ्य सचिव डा।रोशन पोखरेल र मन्त्रालयमै कार्यरत अतिरिक्त सचिव डा.दीपेन्द्ररमण सिंह विशिष्ट श्रेणीको पाँच वर्षे कार्यकाल पूरा गरेर हिजोदेखि अवकाश पाएपछि दुई पद रिक्त भएको हो ।

मन्त्रालयमा आयोजित एक कार्यक्रमकाबीच स्वास्थ्यमन्त्री प्रदीप पौडेलले सचिवद्वय डा. पोखरेल र डा.सिंहलाई बिदाइ गरेका छन् । बिदाइ कार्यक्रममा मन्त्री पौडेलले दुवै सचिवलाई सेवा निवृत्त जीवनको शुभकामना व्यक्त गर्दै उनीहरूको अनुभव र दक्षताको सदैव खाँचो हुने बताएका थिए । 

रिक्त दुई पदमा बढुवाका लागि मन्त्रालयमै कार्यरत अतिरिक्त सचिव डा.सङ्गीता कौशल मिश्र, डा. विकास देवकोटा र डा. टङ्क बाराकोटी प्रतिस्पर्धामा छन् । सचिव बढुवाको पहिलो बरीयतामा डा. सङ्गीता कौशल मिश्र रहेकी छन् । उनी मन्त्रालयमै अतिरिक्त सचिवको जिम्मेवारीमा छन् ।

दोस्रो बरीयतामा डा।विकास देवकोटा र तेस्रो बरीयतामा डा. टङ्क बाराकोटी छन् । देवकोटा स्वास्थ्य सेवा विभागको महानिर्देशकको जिम्मेवारीमा छन् भने बाराकोटी मन्त्रालयका अतिरिक्त सचिवको जिम्मेवारीमा छन् ।