काठमाडौं- गत भदौ २३ र २४ गते भएको जेन-जी आन्दोलनका क्रममा सर्वोच्च अदालत तोडफोड र आगजनीमा संलग्नमध्ये दुईजनालाई प्रहरीले पक्राउ गरेको छ।

सर्वोच्चमा गरिएको आगजनीमा संलग्नमध्ये झापाको भद्रपुर नगरपालिका–१ का २८ वर्षीय ज्योति थापा घताने र ललितपुरको महालक्ष्मीस्थान नगरपालिका–५ का ३० वर्षीय ब्राउन भन्ने सुशील श्रेष्ठ पक्राउ परेका हुन् ।

जिल्ला प्रहरी परिसर काठमाडौंका एसपी तथा प्रवक्ता पवनकुमार भट्टराईले सामाजिक सञ्जालमा सार्वजनिक भिडियोका आधारमा उनीहरूलाई पक्राउ गरिएको पुष्टि गरे ।

भट्टराईका अनुसार पक्राउ परेका घताने र श्रेष्ठविरुद्ध आपराधिक अपराधको कसुरमा ७ दिनको म्याद लिएर अनुसन्धान भइरहेको छ।

गत भदौ २४ गते जेन–जी आन्दोलनको क्रममा सर्वोच्च तोडफोड र आगजनीमा उनीहरूको संलग्नता देखिएको प्रहरीले जनाएको छ।

सर्वोच्चमा लगाइएको आगो दमकल अभावमा तीन दिनसम्म निभाउन नसिएको प्रधानन्यायाधीश प्रकाशमानसिंह राउतले बताइसकेका छन् ।

नेपाली सेना र काठमाडौं महानगरपालिकाको दकमल नआएपछि तीन दिनमा ललितपुर महानगरपालिकाको दमकल बोलाउनुपरेको उनले बताएका थिए ।