काठमाडौं– सरकारले तीन मन्त्रीको सहभागितामा गरिएको सहमति कार्यान्वयन नगरेको भन्दै नेपाल चिकित्सक संघले आक्रोश व्यक्त गरेको छ। 

संघले बुधबार एक विज्ञप्ति जारी गर्दै पुनः सशक्त आन्दोलनमा जान बाध्य हुने चेतावनी दिएको छ । संघका महासचिव डा. सञ्जीव तिवारीद्वारा जारी विज्ञप्तिमा संघ र नेपाल सरकारबीच प्रधानमन्त्रीको निर्देशनमा असार २४ गते भएको तीन बुँदे सहमति अहिलेसम्म कार्यान्वयनमा नआएको उल्लेख गरिएको छ । 

सहमतिअनुसार सात दिनभित्र कानुनी तथा नीतिगत संशोधनका लागि सुझावसहित प्रतिवेदन पेश गर्न कार्यदल गठन गरिने भनिए पनि अझैसम्म ठोस प्रगति नभएको विज्ञप्तिमा जनाइएको छ । 

संघले कार्यदल पूर्ण रूपमा निष्क्रिय रहेको ठहर गर्दै, उच्च पदस्थ सरकारी अधिकारीहरूसँग भएका सहमति समेत पालना नभएको अवस्थामा भविष्यमा ती अधिकारीहरूको मौखिक वा लिखित प्रतिबद्धताप्रति विश्वास गर्न नसकिने स्पष्ट पारेको छ । विज्ञप्तिमा यस्तो प्रवृत्तिले सरकारको विश्वसनीयता गुम्ने खतरा औँल्याइएको छ ।

संघले सहमति तत्काल कार्यान्वयन गर्न सबै सरोकारवाला निकायलाई गम्भीर बन्न आग्रह गर्दै, आफूहरूलाई पुनः आन्दोलनमा धकेलिएको खण्डमा यस पटकको आन्दोलन अझ सशक्त हुने चेतावनी दिएको छ । 

संघले उपभोक्ता अदालतले चिकित्सक र स्वास्थ्य संस्थामाथि जरिवानाको फैसला गरेको विषयमा विरोध जनाउँदै सो निर्णय खारेज गर्न माग गर्दै आएको छ ।