काठमाडौं – नायक अनमोल केसी विगतमा एक फिल्म प्रदर्शनमा आएपछि मात्रै अर्को साइन गर्ने गर्थे । उनी पाइपलाइनमा राखेर फिल्म गर्ने नायकमा पर्दैनन् ।

उनी आफैँ भन्दै आएका थिए, ‘म वर्षमा एउटा फिल्म गर्छु । एउटा फिल्म प्रदर्शनमा आएपछि मात्रै अर्को साइन गर्छु ।’

तर, अहिले अनमोलको पाइपलाइनमा छायाङ्कन गर्न बाँकी दुई फिल्म रहेका छन् ।

अनमोल चाँडै ‘बाटुलो जुन’को छायाङ्कनमा निस्कने तयारीमा छन् । यो उनको होम प्रोडक्सनमको फिल्म हो ।

‘बाटुलो जुन’को निर्देशक अनमोलका बुवा भुवन केसी हुन् । भुवनकी श्रीमती जिया केसीको दर्ता गरेको नयाँ ब्यानर सनराइज पिक्चर्स प्रालिबाट यो फिल्म बन्दैछ ।

यो पनि : फिल्म ‘फर्की फर्की’विरुद्ध मुद्दा दायर, अनमोल पनि विपक्षी

यो फिल्ममा नायिका प्रिन्सी खतिवडा फाइनल भएकी छन् । यस फिल्ममा अनमोल र भुवन दुवै शीर्ष भूमिकामा रहनेछन् । अर्थात्, यी बुवा छोरालाई एकै फिल्ममा शीर्ष भूमिकामा दर्शकले पहिलो पटक देख्न पाउने भएका हुन् ।

अहिले अनमोलले अर्को फिल्म ‘ए मेरो हजुर ५’मा आफ्नो अभिनय रहने सामाजिक सञ्जालबाट जानकारी दिएका छन् ।

यो फिल्मको नायिका सुहान थापा हुन् । उनकै आमा झरना थापाले यो फिल्म निर्देशन गर्ने बुझिएको छ । सुहानाको होम ब्यानर सुहाना थापा एन्टरटेन्मेटबाटै यो फिल्म बन्ने बुझिएको छ ।

अनमोल र सुहानाले यसअघि ‘ए मेरो हजुर ४’मा सहकार्य गरेका थिए ।

‘बाटुलो जुन’को छायाङ्कन सकिएपछि ‘ए मेरो हजुर ५’को काम अगाडि बढाउने तयारीमा अनमोल रहेको बुझिएको छ ।

पछिल्लो समय ‘ए मेरो हजुर ५’ का लागि विभिन्न नायकलाई प्रस्ताव गएको गसिप बाहिरिरहेका थिए । प्रदीप खड्का, समीर भट्ट र पल शाहसम्मलाई यो फिल्मको लागि प्रस्ताव गएको चर्चा थियो ।

अनमोलको शीर्ष भूमिकामा रहेको फिल्म ‘जेरी अन टप’ पनि छायाङ्कनमा आउन बाँकी छ । उनले चैत दोस्रो साता नै यो फिल्मको छायाङ्कन सकेका हुन् ।