काठमाडौं– भारतले ल्याटिन अमेरिकी मुलुक ग्वाटेमालालाई करिक ६ सय कृत्रिम हातखुट्टा प्रदान गर्ने भएको छ । भारतले मानवीय सहायता अनुरुप ग्वाटेमालालाई ६ सयभन्दा धेरै कृत्रिम हातखुट्टा प्रदान गर्न लागेको हो ।

ग्वाटेमालाको राजधानी ग्वाटेमाला सिटीस्थित भारतीय राजदूतावासले यसबारे पुष्टि गर्दै प्रशासनिक प्रक्रिया पूरा भएको जानकारी दिएको छ । भारतीय समाचार संस्था एएनआईका अनुसार भारतीय विशेषज्ञहरुले कृत्रिम हातखुट्टा जडान गर्नेछन् ।

भारतको भगवान महावीर विकलांग सहायता समितिका विशेषज्ञहरुले आगामी अक्टोबरमा ग्वाटेमालाको रक्षा मन्त्रालय परिसरमा शिविर सञ्चालन गर्ने तयारी भइरहेको छ । ग्वाटेमालाका लागि भारतीय राजदूत मनोज कुमार महापात्राले भारतको यस पहलले दुई मुलुकबीचको सम्बन्ध र सहकार्यलाई थप गहिरो बनाउने विश्वास व्यक्त गरे ।