काठमाडौं- नेकपा माओवादी केन्द्र केन्द्रले प्रधानमन्त्री केपी ओलीलाई एक दिन पनि सरकारको नेतृत्वमा बस्ने नैतिक अधिकार नरहेको निष्कर्ष निकालेको छ ।

बुधबार पार्टी कार्यालय पेरिसडाँडामा पत्रकार सम्मेलन गर्दै माओवादी केन्द्रका प्रवक्ता एवम् उपाध्यक्ष अग्निप्रसाद सापकोटाले राजनीतिक रुपमा वर्तमान सरकारले वैधानिकता गुमाइसकेकाले आफ्नो औचित्य स्थापित गर्न पूर्णतः असफल भएको बताए ।

अब यो सरकारलाई एकदिन पनि सत्तामा रहने नैतिक अधिकार नरहेको उनको तर्क छ। उनले वर्तमान गठबन्धन अप्राकृतिक, अपारदर्शी र संवैधानिक नैतिकताविपरीत बनेकाले देश र जनताको हितमा एउटा पनि राम्रो काम गर्न नसकेको जिकिर गरे ।

त्यस्तै माओवादीले प्रचण्ड नेतृत्वको सरकारले अघि बढाएको भ्रष्टाचारविरोधी अभियानलाई उल्टाउने मात्रै नभई सुशासन कायम गर्न लागेका अधिकारीलाई छानी छानी यो सरकारले दण्डित गरेको पनि निष्कर्ष निकालेको छ ।

प्रवक्ता सापकोटाले आफ्ना मान्छेको निर्लज्ज ढंगले संरक्षण गर्ने र विपक्षीप्रति सत्ता र शक्तिको दुरुपयोग गर्दै प्रतिशोधपूर्ण कारवाहीको श्रृंखला नै खडा गरिएको बताए । उनले वर्तमान सरकारका निर्णय सवै बिचौलियाको स्वार्थमा जनहित र राष्ट्र हितविपरीत रहेको उल्लेख गरे ।

त्यस्तै माओवादी केन्द्रले शिक्षकका माग पूरा गर्नुभन्दा सरकारले उनीहरूलाई होच्चाउने र अपमानित गर्ने काम गरेको जनाएको छ । शिक्षा विधेयक फास्टट्रयाकबाट पारित गरेर शिक्षकका जायज माग पूरा गर्न माओ‌वादीले सरकारसँग माग गरेको छ ।